Turmush — Чүй районунун тоо тарабында жайгашкан Онбир-Жылга айыл аймагындагы тургундардын дээрлик көпчүлүгү мал чарбалык менен жан багышат.
Айыл аймак катары 1996-жылы түптөлгөн. Административдик-аймактык реформадан кийин Шамшы жана Онбир-Жылга айыл аймактары бириктирилип, Онбир-Жылга айыл аймагы түзүлдү.
Айыл аймакта жалпы 8 айыл бар, калкынын саны 7800 адам. 2024-жылдын бюджети жалпы 28 млн 994 миң сомду түзөт.
Онбир-Жылга айыл өкмөтүнүн башчысы Нурбек Исаев 2024-жылы аткарылган иштер боюнча маалымат берди:
1. Айыл чарба багыты боюнча 2024-жылдын жазгы вегетация убагына даярдык көрүү максатында айылдардын ичиндеги ички чарбалык сугат арыктары атайын техника менен 11 чакырым арык тазаланып, чийилди. Жергиликтүү бюджеттен 311 миң 500 сом каралган;
2. Жергиликтүү бюджеттин эсебинен 350 миң сомго калктуу конуштардын ичиндеги жолдорго шагыл төгүлүп, түздөтүлдү;
3. Республикалык бюджеттин эсебинен 21 млн сомго Токмок—Прогресс—Кайырма унаа жолунун 3 чакырымына асфальт төшөлдү;
4. Онбир-Жылга айыл аймагынын калктуу конуштарынын борбордук көчөлөрүн жакшыртуу максатында айылдардын түнкү чырактары орнотулуп, аялдамалар жаңыртылды;
5. Республикалык дем берүүчү гранттын эсебинен 2 млн 712 миң сомго Онбир-Жылга айылынын А.Керимбаев атындагы орто мектебинин сырткы фасады жасалды. Ошондой эле, 3 млн 485 миң сомго Шамшы айылынын Рысменде уулу Акмат атындагы орто мектебинин чатырын алмаштыруу иштери жүрдү.
6. Онбир-Жылга айыл өкмөтүнүн «Жашыл Келечек» муниципалдык ишканасынын материалдык-техникалык базасын чыңдоо максатында 4 млн 700 миң сомго экскаватор, 4 млн 700 миң сомго таштанды жыйноочу атайын техника, 1 млн 680 миң сомго атайын айыл чарба техника шаймандары сатып алынды;
7. «Ак Жалпак» таза суу долбоорунун алкагында 18,0 млн сом бөлүнүп, 1,5 чакырым таза суу түтүгү алмаштырылды. Ак-Жалпак таза суу топтогучтун аймагы тегерете темир тосмо менен тосулду жана 500 тонналык таза суу резервуары курулуп бүттү. Ошондой эле, аталган фонд аркылуу Кош-Кашат айылында 810 метр таза суу түтүгү жаңыртыды. Сметалык баасы 940 200 миң сомду түзөт;
8. Чет өлкөлүк демөөрчүлөр тарабынан Онбир-Жылга айылында 3 чакырым таза суу түтүгү алмаштырылып, 80 тонналык таза суу сактагыч орнотулду. Жалпы 3,0 млн сом жумшалды. Ушул эле демөөрчүлөрдүн каржылоосу менен Маданият айылынын жаңы көчөлөрунө 1400 метр жаңы таза суу түтүктөрү тартылды. Куруу иштерине 1 800,0 млн сом сарпталды. 1 млн 200 миң сом бөлүнүп, Прогресс айылынын борбордук көчөсүнө 1500 метр таза суу магистралы жаңыртылды;
9. Маданият айылында «Манас өргө» сейил багын куруу иштери жүрүп, 90 пайызы бүткөрүлдү;
10. Маданият айылынын Чүй жана Кемин райондорунун административдик чек араларына стелла орнотулду жана ачуу аземи өткөрүлдү. Сметалык баасы 908 миң 500 сомду түзөт;
11. Кыргыз Республикасынын 2022-жылдын 30-июнундагы «Энергиянын кайра жаралуучу булактары жөнүндө» № 49 мыйзамынын негизинде Онбир-Жылга айыл аймагына караштуу Тээк-Таш капчыгайынан «Нурал-Энерго» ЖЧКсына 4,2 га жер тилкеси берилген. Учурда аталган ЖЧК тарабынан Шамшы дарыясынын жээгинде чакан ГЭС куруу иштери жүрүп жатат. Курулуш иштерине 600,0 миң АКШ доллары сарпталды. Анын ичинен 200,0 миң АКШ доллары гидротурбинаны орнотууга жана 400,0 миң АКШ доллары атайын техниканы жалдап иштетүү, күйүүчү майлоочу майларды сатып алуу жана жерди казуу иштерине жумшалды. Ишке киргизүү 2025-2026-жылдардын ичинде пландаштырылууда;
12. Өзгөчө кырдаалдарды алдын алуу жана кесепеттерин жоюу иштерине жергиликтүү бюджеттен 200,0 миң сом каражат бөлүнүп, 1,5 чакырым селди буруучу каналдын нугу тазаланды жана 6 чакырым унаа жол оңдоп-түзөөдөн өткөрүлдү.
